"" .. رمضان الخير يا رمضان .. ""
كل عام وانتو بخير أخواني المتبلغرين =)
.
.
شلونكم شخباركم اشتقتلكم
^_^
عساكم من العايدين والفايزين
وانشالله تستغلون هالشهر بالخير والعبادة
.
وخرو عن التلفزيون شوي وجابلوعبادتكم لوول وادعولي انا بعد اوخر عن التلفزيون
-_*
اصلا الدوام بياخذ اربع ترباع الوقت .. باط جدي هالدوام
.
بس الله يعين ..
.
.
v
انزين انا اليوم يبتلكم نشيدة وايد حلوة من الحان و اداء المنشد المبدع مشاري العرادة
اترككم ويا الكلمات وبالاخير لنك حق فيديو كليب النشيدة
~~~~~~~
أقبلت يا رمضان الخير ..
مشرقة أيامك الغرّ بالآلاء والنعم
رمضان .. رمضان الخير يا رمضان
فيض من العلم والإيمان ..
صيّبه عم الوجود وساق الخير للنسم
أشهر أنت أم رؤيا متاب ..
تألق طيفها مثل الشهاب
جعلت الناس في وقت المغيب ..
عبيد ندائك العاتي الرهيب
كم ارتقبو الأذان كأن جرحا ..
يعذبهم تلافت للطبيب
الصوم لله يجزي كيف شاء به ..
يا رحمه الله فاجزي الذنب بالكرم
~~~
~~~~~~
وهذا اللنك للاستماع والتحميل =)
v
v
دعواتكم
"" .. Manooya .. ""
"" .. BaCk To SchOoL .. ""
Salut =)
ثقافتي فرنسية اليوم ديرو بالكم
بمناسبة موسم العودة للمدارس و بما أني دار علي الزمن وخلصت مدرسة صارلي ثلاث سنين اقول حق اللي لما الحين عنونين
يا حظكم @_@
والله احلى ايام ايام المدرسة كانت جو ثاني
صج وقتها كان تحلطم وملاقة قعدة من الصبح ودراسة
بس ما تحسون بقيمتها الا باخر يوم دوام اهو بجي اهي مناحه تقومون تلمون حتى بيبان الصفوف
اهههيي .. سالو مجرب =)
>__< احلى سنتين دراسة مرو علي ثالثة ورابعه ثانوي لاني غيرت المدرسة المليقة اللي كنت مسجونه فيها والسبب انها كانت قريبة من بيتنا
صج اني رحت اخر الدنيا بس فعلا ارتحت هناك
خلوني احط لكم قصيدة كتبتها بثانية او ثالثة متوسط مو ذاكرة والله بس بين هالسنتين
تعبر عن مدى حبي للمدرسة اهههييي =))
عاد مع اني كنت وقتها شاطرة بس اخليكم ويا القصيدة =
::
ودي اشكي عن اللي ربي بلاني به
بالدراسة مسكتًَة ومحد(ن) يكلمني
هذاك أول يوم كنت انا لك حبيبة
يالمدرسة ويوم كنتي تبيني
ودي اشكي على المواد العصيبة
وعليج يا ابله يوم انج ما تفهََميني
رياضيات .. عله ,غم .. ومصيبه
والعلوم ادق اصبع واقول ارحميني
واجتماعيات يا اخي شوصفلك عجيبة
يبونا نحفظ هذرة وتواريخ وشهور وسنيني
والدين ياللي كل سؤال كنت انا له مجيبه
اليوم لا فتحت الكتاب وقريته .. غفت عيني
والعربي يلي كنت انا فيه اديبه
اليوم ابكي واقول يا ناس وشصار فيني
بس بالانجليزي اللهم اني رهيبة
الحمدلله انه في هذي عطف فيني
اول يوم كنت انا بالصف رزََه وهيبة
اليوم حطوني باخر كرسي عاليميني
وصرت من الدواويح والاصفار قريبة
اما العلامات اللي كانت ما عادت تبيني
وامي متعشمة فيني وتقولي صيري طبيبة
اقولها يمه .. انا ابي اللي يداويني !!
وسلامتكم وسلامت الحاظرين =)
~~~~~~
"" .. Manooya .. ""
"" .. مالي شغل بالسوق .. مريت اشووووفك .. ""
قبل ..
ايام الشباب يوم ما كان عمري 15 و 16 اللي الكل يعرف انها فترة يكون الفضول فيها عند الانسان في
اوجه ويحاول انه يصير ابو العريف بكل شي
بل بل بل @_@
ويبداأ اللسان بالنمو والاستطاله الى حد غير معلوم طبعا اللي يحدد طول اللسان قابلية الشخص لمقطه وقابلية
المجتمع لسحبه اههيي =)
اذن المسالة عبارة عن مقط وسحب كما هي الحياة اخذ وعطا ,,, انزين درينا انج فاهمة لا تشطين عن الموضوع وايد >>>>
بما اني كنت احب الطلعه في هالمرحلة العمرية بالذات لزوم التطمش ومعرفة كل ما هو جديد ,,,
وين راحت الهمه الحين ما ادري =
صار موتي وهلاكي والطلعه ما احب اطلع !
كنت الاحظ تصرفات غريبة من بعض رواد الاسواق والاماكن العامة عموما
اشياء ما كنت افهمها وايد
يعني هههه ايام قبل كان الترقيم يضحك
جم مرة طحت على ناس وانا ما ادري وكانت اشكالهم حد الغلط بس كانو يستحون مو الحين عينهم قوية
ويخزون بعد @_@
من المواقف اللي اتذكرها باطاري الترقيم واللي صارت شوفة عيني
:
ترقيم بالسوق :
مرت من يدامه .. انعجب فيها اهي تعطيه ويه او ما تعطيه اذا كان خوش صبي راح يستحي على ويهه ويحترم
نفسه ويقعد مؤدب
اما اذا كان ويهه عريض راح يقوم و(يلهث) وراها السوق كله
والاخت ما يتم محل شيلات ولا ملابس ولا عطور ولا مكياج ولا حمام وانتو بكرامه
ولا كوفي شوب الا ما يلفه في سبيل انها اخر شي وعند السيارة والاخ وراها يقولها ترى تعبتيني
(هذي احسن طريقة اذا كان متين راح يصير رشيق ويعضل بعد ههه)
وبالنهاية تقوله انت ما تستحي على ويهك !
تكفين تو الناس !
او يمكن تكون قاع تختبر اخلاصه وقوة تحمله انه تم وراها وما توفى لما الحين =) !
فتاخذ الرقم ويكون الطرفان علاقة مو علاقة مفاتيح ولا ملابس لكنها علاقة غالبا بالنهاية تكون معلقة !
ترقيم البحر :
البحر الناس تروحله عشان تتمشى او تتسبح او تقعد ويا اهلها او تشوى او .....
تقز @_@
أي نعم للاسف صارت هذي غاية بعض الشباب من الطلعه
المهم قز البحر اصعب شوي لان المكان مكشوف فيظطر الصبي ان يستعمل الورقة الصفرا اللي تلزق
عرفتوها ؟
عشان تبين بليل وهم عشان ما تطير بالهوا =)
اذكياء رجال المستقبل اشفيكم !!
فاذا شاف الهدف يلزقها ابمكان وياشر عليها وغالبا هالمكان يكون قريب من (الزبالة) عزكم الله عشان
على بوانه البنت بتروح تقط شي فيها وتاخذ علاقة من (فوقها) !
ترقيم بالشارع
عالماشي يحتفظ المرقم بلوحه من الورق المقوى يكتب فيها رقمة ويشهرها بوجه الضحية (هذا ايام قبل)
الحين يكتب على يسارته من ورا للبيع ويحط الرقم الذهبي المسطر لوول على مين يا اخينا
اهم شي انه كاتبها بستيكرز عفية سيارة محد شراها =)
او انه الريال يمكن ما يكلم الا وحده مثقفة فيحط عملية حسابيه يطلع ناتجها رقم تليفونه
والله ايضحكون شباب الكويت
ترقيم بالغصب :
بكل بساطة ومن غير مقدمات واهي ماشية بالسيارة قوم وادعمها من الخلف !
(عشان يصير الغلط عليه ولازم يتحمل مسؤولية التصليح)
طبعا لازم الدعمة تكون خفيفة عشان لا يكون اول موعد بالمستشفى لول وبنفس الوقت تسوى انه يتحمل عبء
التصليح و علاقة من اولها تدعم شنو تاليها !
طبعا في بعد وايد بس ما ابي اطول عليكم
بس هذا بالنسبة حق قبل
السؤال اللي ابي اعرف اجابته شلون صارت طرق الترقيم الحين
مع تطور الزمن ووجود الاساليب الحديثة ؟
واللي شهد موقف لا يبخل علينا فيه =)
~~~~~~~
"".. Manooya ..""
"" .. هل انت قبسة ؟؟ .. ""
لوول ادري بتحقدون علي على هالعنوان
الى اي درجه انت قبسة وويهك فقر ؟؟
يترواد هذا السؤال في ذهن الكثيرون ممن يعانون من داء النحس المنتشر منذ العصور الازلية والسبب غير معروف لحد الان !
اكيد كل واحد فينا لما يصيرله موقف يقول يا ربي ليش جذي كله يصير فيني واذا اشتدت فيه الحالة يمكن يتهور وياكل وجبه من هارديز يقع اثرها متسمما وهم يرد يقول يا ربي ليش صار فيني جذي =\ !
اكيد بتقولون هذي شفيها قاع تقبس علينا بهالبوست بس لاا لاااا من صج هذي مشكلة عويصة ترى !
اعاني منها من زمان .. هو اني كل ما احب شي او منتج معين وأألفة و اتعود عليه ينقطع من السوق @_@
Hungry bunny
قبل .. يوم كنت في اوج طفولتي البريئة ما يصير يعدي الاسبوع بدون وجبات الارنب الجائع
–الله يرحمه- جك بوم والا شايلينه واستلم يا بجييي ابي الارنب تطلعونه من قبره !!
اخر شي قصو علينا فبرجر كنج الظاهر ارنبهم مات من اليوع اههييي وراحت ايامه الله يذكره بالخير
بس عندي ساعه أثرية كنت رابحتها ويا وجبة من عندهم على شكل مضرب تنس ومرسوم داخلها الارنب
اللطيف وتأبى المروءة اني اشيلها من داري ههه شفتو شلون انا مخلصة =)) !
بس الله يرحمك يا ارنوب !
Baskin robins
لا المحل لما الحين موجود ولله الحمد بس يتلهم فترة يسوون مشروب لذيييذ حده عمري ما ذقت مشروب نفسه اسمه سموذي smoothie كنت ادمااااااان عليه اهو مكوناته عبارة عن فروالة وايس كريم وتوت وبعض الاضافات اللذيذة وبالخلاط بس كان فيه سحر لا يقاوم !
يوم من الايام رايحه الفرع المتفرع وادش بكل ثقة والسعاده تغمرني لاني متأملة بشربه ,,,
ويستقبلني الفلبيني بابتسامه شاقه حلجه جنه يعرفني من ايام الروضة :
هااااي مدااام قان اي هيلب يوووو ( الـ ك عندهم ق ما عليه طوفو)
انا : هااي كان اي هاف سموذي بليز >> اهم شي بليز نفس ما علمونا بالمدرسة
الفلبيني : اووووووووووووووه ام سو سوري وي ار نوت ميقين ات اني موووووور
انا : انصقعت .. يتني 3 انفعالات في وقت واحد @_@
الاول اني انصدمت الثاني دمعت عيني الثالث استجمعت فيه قواي العقليه اللي تطشرت بفعل الصدمة
وبينما كنت ايمعهم جان تطري في بالي فكرة !
قلت ليش ما اصير ذكية لمدة دقيقتين واخذ منه المقادير والطريقه =D
الله علي الله اشرايكم فيني ذكية مو ;P
وبالفعل التقطت ورقة وقلم وقلتله عطني الرسبي لابو الحظ العوي اهووو
وصرت اسويها على طول بالبيت بس يتني فترة قطعت والحين نسيت الطريقة =
و الله يرحمك يا سموذي !
Lip smaker
اعتقد 90% من البنات راح يعرفونه والي ما يعرفونه هذا مرطب شفايف فيه لون خفيييف حده وفيه طعم حلو
كنا نستخدمه ايام الطفولة والمراهقة
ولاني كنت مرابطة بالجمعية ايامها اوووه كان احلى مكان عندي الجمعية لوول ايام العشق الحلاوي- كاكاوي وشفت المرطب هذا وصار بينا الفة ومحبه
وبعد مرور سنه اختفى هذا الكائن من الوجود @_@
والله يرحمك يا لب سماكر !
اهئ اهئ لحظة خلامسح دموعي عشان اعرف اكمل ="
وشغلات وايد بس مو متذكرتها الحين ..
Max factor
بس اخر شي والصدمة المؤلمة هي ...
بودرتي المفضلة .. ( لا تفهموني غلط يا جماعه بودرة ميك اب =\ )
ادري هالماركة مو بروفيشنال ولا راقية ولا شي بس صج انا جربت اغلى واحسن الماركات بس مثل هالبودرة ما شفت =(
بكل المحلات مخلصة ماكو بعد القرادة شلون صايرة ؟
لا واللي يبط الجبد ان رقم( 1) اللي هو الدرجة اللي ابيها اهو اللي مخلص ومقطوع من الشركة بكبرها =
خلاعطيكم مواصفاتها يمكن تمرون محل ميك اب سالولي عنها اذا موجودة قولولي ولا تنسون تسكرون المحل بالشمع الاحمر عشان محد يدش وياخذها قبلي @_@
ماكس فاكتور الي غلافها ذهبي رقم واحد ="(
بعد هالمأساة قولولي ان مو بس انا ويهي فقر لوول اكيد في مواقف مشابهه صارت لكم
واسوني فيها
~~~~~~~
"" .. Manooya .. ""
