"" .. معتقدات الطفولة .. ""
لما كنا صغار قبل كنا نسوي اشياء عبيطة .. وكانت عندنا أفكار ومعتقدات عبيطة أيضا"
مثلا :..
كنت اعتقد ان لازم ناكل التفاحه ويا التاق الي عليها لانه الفايدة تكون متركزة فيه !!
باختصار شبعانه قراطيس يعني -____-"
كنت اعتقد ان البنك يطلعونه من البحر "لانه طعمه نفس ماي البحر" وكنت اعتقد انه نوع من الطحالب بعد =\
وسويت فرقة تنقيب عن البنك بس بائت بالفشل الذريع لاني لقيت اشياء لا تمت للطحالب بصلة !!
اي يعني ليش يغيرون حفاظات عيالهم بالبحر !!
كنت اعتقد انه اذا ربطت عباية امي او شرشف على رقبتي من ورا "نفس سوبر مان" راح اطير !!
الحمدلله ان محاولاتي ما تجاوزت الكبت وسور الحديقة !!
كان في مشروع سطح بس عدت الى رشدي باخر لحظة .. منو رشدي ؟؟!
كنت اعتقد ان الايس كريم يصنعونه من الثلج الي يطيح بامريكا !!!
كنت اعتقد ان الممثلين يعيشون داخل التلفزيون -__-"
كنت اعتقد ان الالعاب والدبب تتكلم وتطلع لما نكون نايمين " وايد متأثرة بالكرتون" !
كنت اعتقد ان الشرطة والمدرسين والدكاترة انخلقو جذي .. يعني مو اوادم مثلنا !!
كنت اعتقد ان اذا تكلمنا بسرنا الناس تقدر تسمع .. نفس كابتن ماجد كانو يتكلمون بسرهم ويردون على بعض -_-"
كنت اعتقد ان الي ما بتكلمون خليجي كلهم مصريين !! بما في ذلك لبناني - سوري - اردني - مغربي الخ
كنت اعتقد ان الشخصيات الكرتونية "التنكرية" من صج اهم يايين من ديزني وهذا ميكي ماوس وناسة الي يطلع بالتلفزيون .. لين كانت صدمة عمري يوم شال الي على راسه والا هندي .. حاشني احباط -___-"
كنت اعتقد ان الواحد ما يكبر الا اذا سووله عيد ميلاد !!
كنت اعتقد ان اذا بطلت عيوني بحمام السباحه او البحر اقدر اتنفس تحت الماي .. جم لتر بلعت تتوقعون ؟!!
كنت اعتقد اذا اخذت بيضة من الثلاجة وقعدت عليها راح تفقس ويطلع كتكوت =\ !
هذا الي اتذكره وما خفي اعظم =)
شاركوني بمعتقداتكم
"" .. أسعد الله ايامكم .. ""
السلام عليكم =)
تقبل الله طاعتكم ..
ابسرعه خلص رمضان ماشالله .. ما حسينا فيه !
امس ضاق خلقي ويمكن انتو بعد انه شلون خلانا بسرعه =(
بس الحمدلله انجزت اشياء من زمان ودي اسويها بهالرمضان =)
ينعاد عليكم بالخير والصحة والعافية يا رب
وعيدكم مبارك ^_^
يلا الحين خلصنا من الرسميات والمقدمه ويينا للجد
قرقشو مخابيكم ها ها ها
ملاحظة : يمنع منعا باتا احضار الخردة
ولا تقبل الاوراق النقدية اقل من فئة 20 د.ك
وشكرا ;P
استانسو بالعيد وقولولي وين رحتو وجم عيدية حصلتو -_^
تحياتي حبايبي
"" .. Manooya .. ""
"" .. ShOpPiNg العيد .. ""
قوة جماعه شونكم زينين ؟
تسوقتو حق العيد والا بعد ؟
شكلكم والله انتو الي خلصتو الملابس بالسوق لانه ما لقيت شي !!
اليوم وبعد عناء طويل
وحنه من امي العزيزة
ورجاءات من اخي العزيز
ونظرة تهديد من خدامتنا الموقرة (ابو عوف)
@_@
شرايكم بالاسم الي مختارته لها =\
المهم انه لايق عليها اههيي
طبعا ورا كل هالضغوط طخيت ورضخت لطلباتهم وطلعت السوق !
بعد عمري اهلي اههيي
لو رافضة جان تشلخت زف =")
المهم رحنا مارينا
-ادري بتقولون هذي ما عندها غير مارينا-
بس هذا الواقع المرير
لانه هناك تقريبا في محلات القى عندها الي ابيه
وانا بالطريج ياني الاحساس البطاطي فجأة جان امسك التليفون تلقائيا
وادق على رفيجتي حبيبتي
انا : وينج ؟
شيوم : بالسالمية ادور ملابس حق العيد
انا : صج ؟؟؟!!!
انا بعد هناك =D
تعالي مارينا شوي واوصل
شيوم : اوكيييي ^_^
وفعلا تلاقينا هناك لفلفنا شوي وكلينا ايس كريم
بعدين راحت لانها كانت ياية ويا ريلها
وبيمرون اهلها
طبعا طول ما احنا ماشين وانا :
يوعانه .. يوعانه
امي تقولي لا تمتنين بعدين ما تدش فيج بدله
قلتلها يما رياضة يومين ويتعدل الوضع ..
ويستمر مسلسل اليوع ..
المشكله صارلي اسبوعين اتنسى فبرجر كنج
كل ما ابي اطلب امي تكون مسوية اكله لذيذة وما احب اكسر بخاطرها
لان امهاتنا ما يحبون نطلب من المطعم لما يكونون مسوين اكل اههيي
اكيد انتو بعد
بس اليوم قت دامنا برا يلا فوقه
وبيني وبينكم مو حلوة تطلع بالياهل
جذي والا بويهه صمونه مو شي كلش =\
لا انا قاع اقول جذي عشان تحسون بحالتي بس ^_^"
وانتهى مشوار السوق وطلعت منه بقطعه وحده =\
المشوار الثاني كان الجمعية
شفتو ناس فاضين كثرنا ؟؟
جمعية الساعه 1 !
طبعا انا وقتها كنت مو تعبانه كلش -___-
خذينا اغراضنا ووصلنا قسم البطاط ..
ترا ترا تراااااا
بطااااط ^_^
طبعا انا انطلقت وحسيت بالانتماء
لدرجة اني خذيت 4 جياس بطاط وحطيتهم بالعربانه
لما التفت والا الطامة الكبرى @_@
امي مناك وقاع تضحك
عيل انا وين حطيتهم =\
اطلع والا المرة فاطسة ضحك =\
حطيتهم بعربانة المرة -____-
وا فشيلتاااااه !
رديت البيت ووجنتاي مكتسيتان بالاحمرار على ما حدث =\
حصلتو ملابس حق العيد ؟
اذا اي من وين ؟!
"" .. Manooya .. ""
"" .. ولا له لييييت ;P .. ""
رمضان في آخره .. نيال الي استغلوه بالطاعه وعسى الله يهدي الجميع .. =)
أما بعد ..
باروكوووووووليييي صار عندي فلكر ^_^
سويته امس وحطيت فيه جم صورة
بس لا تتوقعون انه وااو ترى على قدي ولا له ليييت ;P
وطبعا محد بينوره غير زياراتكم الحلوة وارائكم السديدة هع هع
واشكر كل الي نصحوني وساعدوني اني اوصل هالمرحلة يعطيكم العافية ^_^
امممم عندي سالفة قاثتني
اللي اهي دعايات ام تي سي هالسنة ,,
احس انهم مسوينهم بس عشان يبطون جبدي >__<
عرفتوهم ؟؟
الاثنين المليقين ويا الكاسكو .. ياربي شكثر كنت احب الحيوانات الا هالكاسكو ما بلعته !
والا الهندي ابو البطيخ ..
يا ربي ما ابي افسد اعمال هالشهر فيهم ربي سامحني ="))
شحلات دعاية البنك الاهلي مالت بشار والمصري لوول جيكو عليه لما يقول الجيييتسكي والاي بوط
يعني Ipod ;P
بس الي صج شي دعايات كان كل ما اشوفهم تدمع عيني اي ترى انا حساسة =P
شرايكم بمسلسل خالد بن الوليد ؟؟
انا اتابعه ووايد عاجبني صراحة
خصوصا ان الي مسوينه شباب كويتيين ذوو كفاءة =)
بس كحل مسيلمه امس بعرسه خطير صراحه =P
ولا حنان دشتي اههييي
انتو شرايكم بالاوضاع ؟؟
قريبا جدا راح احط الفلكر بالبلوق على ما اخذ المعلومات من المختصين =)
"".. GARFIELD ..""
هااااايز -_*
اكيد كلكم سامعين فيه وتعرفونه
اللي ما يعرفه اهو عبارة عن قطو برتقالي بو تمبه
كسول ويحب الاكل والنوم مثلي تماما ^_^
سوالفه حلوة واتضحك من كثر ما اهو عبيط بس الي صج عاجبني بالموضوع
ان الكاتب جيم ديفس من سنه 1978 لي اليوم واهو كل يوم بالضبط يكتب حلقه متصورين !!
مبدع صراحه =D
اعشق هالقطو اهو وعبطه ^_^
وطبعا ما نسيتكم حبايبي لازم تشاركوني الاشياء الي احبها
يبتلكم لنك حق موقع فيه كل مجموعه جارفيلد
من سنه 1978 لي 2006
وكل سنه فيها 12 شهر وكل شهر فيه 30 يوم
يعني متخيلين جم حلقة بتكون فيه =D
شي يونس ^_^
اخليكم ويا اللنك عشان تستمتعون مثلي =)
.
.
http://pt.jikos.cz/garfield/
"" .. Manooya .. ""
"" .. قرقيعان وقرقيعان .. ""
أول شي صفو بالدور
..
مابي مخامط
.
.
اي خلكم جذي حلوين
يلا عفية عالشطار غنو ^_^
سلم منوية يالله خلها لامها يالله
.
.
الي ما يغني ما اعطيه كاكاو اعطيه حلاو محزر وفستق فيه دود كيفكم
نياهاها ^_^
والله وناسة ايام القرقيعان والفرة بالفريج
يا ريت الطفولة تعود يوما =)
شنو مغامراتكم القرقيعانية =)
