"" .. مجموعه صور من انتاجي ..""
السلام عليكم =)
.
.
اليوم معاي كولكشن متواضع من عبارة عن
بعض الصور اللي صورتها
.
.
اهي اكيد مو بالمستوى لاني مثل ما تدرون في بدايتي
بس انشالله تنال على اعجابكم ^_^
.
.
بس اللي اهم اني ما انحرم من ملاحظاتكم
وانتقاداتكم ونصايحكم
.
.
ما اطول عليكم واترككم مع الكولكشن =)
v
v
هذا مبخر بو شمعه =)
فرش الميك اب ملوتي و .... الاحمر يعبر -_*
البطاط ... شي أساسي =)
انصحكم فيه لذيذ واهو بارد ^_^
فناجين لطيفة =)
MR.leg متكي اههي =)
قلب يحترق
طابور دومينوزي
دبدوب في القفص الخشبي =)
.
.
طبعا عندي وايد صور بس قلت احط هذيله عشان اعرف اذا تسوى اسوي فلكر والا تو الناس
انتو شنو تقولون
؟؟
ابي نصايحكم واقتراحاتكم لا تنسون =)
~~~~~~
"".. Manooya ..""
"" .. يوم في المارينا .. ""
سلام ^_^
اول شي اشكركم وايد حبايبي على سؤالكم عني يوم كنت خرجه =)
الحمدلله الحين صرت وايد احسن وقاعد اتماثل بالشفاء اههيى ..
بما اني من زماااان ما طلعت اقترحت امس على العائلة الكريمة انا نروح في قزة الى المارينا
مينونه ؟؟ مو صاحية ؟؟ لا لا لا اخاف لما الحين مصخنه ؟؟!
مارينا الخميس !!
صج اني ما احب الزحمه بس ساعات الواحد هرمون الطماشة يكون عنده زايد فلازم يفرغه بجم ساعه من الفصلة والتطمش على الاشكال الغريبة اللي يشوفها هالايام =)
<<<< طبعا الطماشة تكون بيني وبين اخوي العزيز اهو اللي فاهمني ههه
v
اهم شي اني عطيت تهديد قوى حق امي العزيزة قلتلها اذا تبين تيين معانا ممنوع ارغامي على دخول محل ملابس اليوم للقز والعشاء فقط @_@
طبعا في علاقة حب عنيفة بيني وبين virgin mega store خذيتلي فرة وكتاب وايد حلو تكلمت عنه اختنا ساره اسمه "سأراقص الدموع" صراحة اسلوب ادبي سلس ويدش القلب بدون استئذان !
v
v
بعد معاناة وحنه وزنه قدرو يشلعوني من فيرجن لنكمل القزة ^_^" طبعا لزوم الطماشة لازم نقعد بكوفي شوب ولو اني مو متعودة كلش وتقريبا اول مرة اسويها اخذنا زاوية انا واخوي بلونوتر "مشروباته فاشلة
" -__-"
ونتامل بالمخلوقات الغريبة اللي قاعد تمشي ........ بس توصلنا حق نظرية !! ا
!
أغلب اللي كانو موجودين يشابهون بعض .. يعني صارو موديلات !
v
v
الصبيان وينقسمون الى :-
-
1- شاب مؤدب : كائن حي ماشي بحالة ماله شغل باحد وغالبا ما يكون مع اهله او اصدقاءه المسالمين .
-
2- بدي بلدر : واهو اللي يكون عادة قصير القامة عريض المنكبين ويختار اضيج بدي عشان يطلع عضلاته المفتوله بفعل الابر وبالنهاية يتكون شكل مقزز يرفضه المجتمع !
-
3- بو عقاد : هالفئة تضم الكراتين وسكان المناطق البعيده – مع احترامي- وعادة يكونون لابسين دشاديش مخصرة وشماغ او مكشوفين الراس ويتمشون ببطئ لرصد تحركات اي بنية ومحاولة ايقاعها ببيت من الشعر يلقيه عليها واهو ماشي !
-
4- خريجين المدارس والجامعات الاجنبية : يكون مبين عليهم التأثر بالغرب بشكل كبير لدرجة انهم يقلدون حتى المشية الـ"كوول" على قولتهم وعادة يكون حاطين ترجيه ولبسهم دايما مرقع نفس الاجانب وما يتكلمون الا انجليزي ...... المشكله ويوههم ما تساعد !
-
5- جماعه المراهقين ما بين 13 – 19 : واهم اللي مستحلين اغلب السوق وتكون رؤوسهم عبارة عن شي يشبه ايس كريم المكاين هذا اللي ايي حليب كاكاو من فوق مبوز عرفتوه ؟؟او سبايكي تيمنا بـ sonic the hedgehog والقلم بوكشة "متوفر بجميع المكتبات" .
-
6- اخواننا ذوو البشرة السمراء : ما تشوف واحد الا ويرقص فجأة !! ما ادري شلموضوع .. يمكن عشان خميس =\
-
اخر شي السطر الثالث : اعتقد فهمتو قصدي ! غالبا يكون مو عاجبة ومضايق ما ادري ليش .. يمكن شايف نفسه بالمنظرة !
~~~~~~~~~
نيي حق البنات :
v
v
1- بنت مؤدبة : نفسي احم احم (ويه بريئ) لوول واهي عادة تكون ماشية بحالها ومالها شغل باحد ومع اهلها او رفيجاتها المؤدبين .
-
2- بنات البلاستيك : كائنات دخيلة على المجتمع تكون عبارة عن استساخ قلبا وقالبا لما يعرض بالتلفاز تلاقون كل شي فيهم متفخ ولازم الشعر كشة ما ادري ليش يمكن يت عالشعر وتعبو !
-
3- بنات (خوات بوعقاد) : كائنات تكتسح بالسواد لبسهم المعتاد عبارة عن عباية ضيقة جداجدا قابلة للانفجار باي لحظة .. هذي الكائنات تيي بعدة اشكال (نقاب بو خدود – شيلة مع قذلة كبيرة – وغالبا يكون مكياج عروس )
"على فكرة تقدرون تميزون بعض بنات السعودية بالعباية والشيلة على الجتف والشعر مفلول تريد مارك"
! مع احترامي لاخواتنا السعوديات وضحت البعض مو الكل ^_^
-
4- الفئة العمرية ما بين سن 8 - 18 : المفروض يكونون اطفال ويتسمون بالبراءة وما فوق مراهقين ويتميز هالعمر بقابلية صاحبه للتقليد الاعمى لكل ما يراه فاذا كان مثلهم الاعلى خواتهم البلاستيك شنو بيطلعون !
v
ملاحظة : غالبا هالفئة تتخذ من البرمودا صيفا والتنورة قصيرة وبوت شتاءا في لبسها واللي يقصر اهو الفايز !
-
5- محجبات ولكن : الكتاب باين من عنوانه طبعا للاسف بعض المحجبات لو يقطونه احسن لانه اصلا مرات يطير بالهوى !
-
5- البويات : شعر سبايكي – بلوزتين فوق بعض "لما الحين ما ادري ليش " =\ - baggy jeans - ونعال نجدية او جوتي اديداس وانتو بكرامة .. تكون ماشية وتتحجى بالتليفون ووياها وحده لابسة قصير يمكن ايون ويا بعض بنفس الكرتونه !
-
!!!
طولتها عليكم ادري بس كان خوش يوم بالنهاية حبيت احطلكم صورتين خذيتهم عالسريع بس كان ودي لو الصبح يطلعون احلى
هذي النافورة اللي بالواجهه الي عالبحر
يختات سافطين مال تاخذلك واحد وفوقه ^_^
" كان في طراد حلو على شكل حمار وحشي صورته بس ما بين بالظلمة حسافة =\
كان في مشروع تصوير اخوي ويا النافورة بس لانه كان ظلمة والفلاش يطلع لون اصفر قلت اجرب بدون فلاش
فكانت النتيجه كالتالي ^_^ "
v
v
v
طبعا انا ما كنت ادري انه بيطلع ظل
وكان مشروع صورة جميلة بس يوم شفته اسود
واللي وراه واضح قلت يبيلة بوزشن فلم رعب =D
عزيزي المواطن : قليل من الشطانه لا تضر =)
"" .. Manooya .. ""
"" .. وعكة صحية .. ""
سلام مع عطسه =\
سامحوني حبايبي صارلي فترة ما كتبت
بس انشغلت شوي بالويك اند كان مليء بالاحداث
اهي سعيدة طبعا .. احم نوعا ما .. لا لالا سعيدة =\
اول شي الاربعاء كان عرس وحده من قرايبي
كان بسيط وحلو الله يهنيها انشاء الله ..
و كللللوش وعليك سعيد وعليك مبارك و... الخ خلصنا =)
منها المال ومنه العيال ما ادري شيقولون كله واحد ^_^"
الخميس وما ادراك ما الخميس !
كان يوم وايد حلو
لانه كان عيد ميلاد رفيجتي العزيزة
طبعا قعدت افكر واخطط شنو اييبلها هدية قلت ابي شي يديد
وووو لما انا ابدأ بالتفكير تتوقف الارض عن الدوران بالمسار الاهليجي
وتنبني مطبة بالميلكي واي لتعطيل الاقمار عن السير
مما ينتج عن حوادث ومصرع واصابات كائنات فضائية
لتستجمع هذي القوى في عقلي الباطن مما يجعل تفكيري خصب
وصالح لاستقبال وانتاج اكبر عدد من المعلومات بسرعه 500 كمث
احم جني شطيت عن الموضوع =\
الخلاصة ان اخر ما توصلت الية اني اييبلها نطاطية *_*
محد يابه لها ولا يخطر على بالها
بس الوقت ما كان يسمح كلش فقررت اني اييبلها كنافة تقزر فيها على ما ايبلها الهدية ^_^
ووصلنا اخيرا بعد ما تنقعنا من قبل الكنفاني
الله يسامحه بس عليه خوش كنافة يديدة جنها خلية نحل
.
.
.
استقبال حار من قبل صديقتي العزيزة وبعض اصدقائها اعرفهم والباجي اول مرة اشوفهم
بس لانه لي مكانه خاصة عندهم احم احم
يعتبروني وحده منهم .. احبهم والله ^_^
طبعا انا مو متغدية وريحه الكنافة صكت راسي بالسيارة
(لاني استحي) اههي نطرت ساعه كاملة جان اقول لها
: ها متى ناكل يوعانه @_@
طبعا اللي يعرفني لازم يعرف قصة الحب اللي بيني وبين الاكل
المهم ويا الهيصة والزمبليطة ووسط الزحمة .....
طططرررراخ =\
ريولي !!
طقو علي اثنينهم ما حسيت بنفسي الا ارجف .. قعدت شوي
بس من الروحه واليية والجو الاحتفالي نسيتهم وكملت
وتناسيت العوار
حاشني شد عضلي
ما حسيت فيه الا ثاني يوم لما قمت من الفراش واهبد عالارض ..
امم تقريبا صارت هزة ارضية ^_^"
وعينكم ما تشوف الا النور حالتي الصحية تدهورت بشكل اكبر
حرارتي مرتفعه وبداية انفلونزا يعني يعني ويع كل شي مرة وحده
يا ربي شكثر اعانييييي =\
حتى اني خذيت مرضية من الدوام
لاني قاع امشي نفس القبقب .. الله يفشلني =\
بس مو بيدي شسوي اهئ اهؤ ..
بس لا تحاتون كلها يومين انشالله واقوم جني شاذي =)
دعواتكم ....
وحشتوني طمنوني عليكم =)
"" .. Manooya .. ""
"".. حان الوداع ..""
لكل شيء نهاية
وبالامس كانت نهاية مرحلة وظيفية استمرت 8 اشهر
ذهبت بكل ما تحمل .. فترة من العمر القصير
أحداثها كثيرة .. ستبقى خالدة في الذكرى =)
شكرا لكم زملائي ..
شكرا على تحمل تقلبات مزاجي
غبائي احيانا =)
شكرا على مساعدتي في الكثير من الامور ..
شكرا لحمل بعض اعباء العمل عني .. بل اكثرها
لا يحضرني الكلام الان .. فقط اردت التعبير عن الشكر ..
ولن اوفي حقكم .. كنتم بالفعل مخلصين =)
أشعرتموني اني في بيتي .. من طيبكم
اتمنى منكم الدعاء ولن انساكم منه حتما =)
اخلاصي وتقديري ..
"" .. Manooya .. ""
"" .. علمتني الحياة ..""
بلحظة من الصفو .. الذي لا انعم به كثيرا ..
استلقيت على فراشي لاتناسى تعب اليوم الحار والجو المتقلب ومجهود العمل وضغوطات الحياة ..
أغمضت عيني لاترك لمخيلتي حرية التنقل في سلسلة من الذكريات ..
وبدأت رحلتي .. فتارة تستوقفني ذكرى سعيدة فأسعد معها وتارة ينتابني الم بسبب ذكرى تسببت لي في ذلك ..
أراهم وكأنني أعيشهم مرة أخرى !
ولكن ما فائدة الذكرى ان لم تنفع المؤمنين !
استغرقت كثيرا وتعمقت .. حتى وجدتني اغيب عن عالم الواقع ..
فلولم يصبني الالم .. لما اشتقت طعم الهناء
ولولم أرى الظلم .. لما احسست بقيمة العدالة
ولو لم أتعرض لخيانه .. لما قدست الوفاء
ولولا القسوة .. لما تقت لدفئ الحنان
ولولا العداوة .. ما كنت قيمت الصداقة
ولولا الوحدة .. ما تعطشت للقاء
ولولا الهجر .. ما عرفت الاخلاص
ولولا الخطأ .. ما كنت ميزت الصواب
ولولا الحزن .. ما احسست بثمن السعادة
ولولا الفشل .. ما كافحت للنجاح
ولولا ظلام اليأس .. ما اتجهت الى بصيص الأمل
وغيرها من المصاعب اللتي مررت بها في رحلتي .. نعم هي مصاعب ومؤلمة ..
لكن ماذا لو نظرنا لها بمنظور جديد
سنجد ان الحياة أخذت منا لتعطينا .. وحرمتنا لتعلمنا وتصقلنا ..
شكرا لك .. ايتها الحياة !
نعم شكرا لك .. ان من يكرهك يجهل حتما قدرك وينكر عطاؤك
قاسية انتي .. ظالمة
لكنك ذكية !
لن أجعلك تنالي مني .. لن استسلم لعقباتك
فأنت لستي سوى مرحلة .. ربما تنتهي غدا ..
"" .. Manooya ..""
ماذا علمتكم الحياة اعزائي =) ؟
"".. التجاري هو اختياري ..""
يوم من ايام المعاشات طبعا الناس تاخذ معاشاتها اخر الشهر احنا لازم يعدي نص الشهر الياي وتطلع علينا طحالب يلا يتذكرونا
لا وبعد شيكات وتعال روح البنك ولوية –حلوة تعال روح-
طبعا استالمنا الشيكات اثناء العمل وفي وضح النهار واما الملأ !! جني اندمجت
جان تييلنا افكار سوداوية بما انه المدير مو موجود والفراش يستغرق في النوم ظبطنا احد العاملين معانا انه يستلم اماكننا على ما نقص الدوام في قزة الى البنك نصرف الشيكات ونيي
وكان لنا ما اردنا
طلعنا نتسحب جنا يهال منحاشين من حصة الرياضيات لول الله يرحم ايام المدرسة .. واستقلينا سيارة زميلتنا
طبعا كنا رايحين انا وزميلتين معاي
انا : انا بقعد جدام انا بقعد جدام
حصة : السيارة سيارتج لو تبين تسوقين عادي تريحيني
انا : ليش ناوية على سيارتج ما تبينها
عطيات : أوعودي يا بت بالمكان اللي يريحك بس عاوزين نئبض –يعني نقبض-
انا : حصوو اطربيننا
حصه : مسجلتي خربانه لج خلق مارينا اف ام
انا : ولييه يلا اي شي بس احس اني بسيارة عادي حتى لو تبين تغنين مو مشكلة اتحمل !
عطيات : ما فيش حاجه مصري ؟
انا : اقول بلعي العافية !
وواصلنا السير الى اقرب فرع للبنك التجاري في المنطقة المنطقية سفطت حصة ..
وكالعادة لما ابي انزل لازم احك الباب بالأوبجكت اللي يكون يمي سواء سيارة , صبة , عامود , بشر !
بس بالنهاية تأسفت للعامود ومشيت
يوم وصلنا امعننا النظر بالمكان .. شنو هذا ليش جذي .. من الزحمة حسيت انه واقفين بطابور خباز ايام الغزو
طالعت اليافطة اي والله البنك . ما عليه
دشينا وشفنا اشكال واللوان واكثرهم مقيمين لان التامين الصحي محولينه عالبنوك فـ الله يعينهم
ولاني ما احب اختلك بالزحمة خصوصا ان الريحه ما كانت تساعد كلش
سالت الكائن الشبه حي اللي كان قاعد بالرسبشن صراحه ما قدرت اميز هل اهو بشر ام خيمة سرك
قلتها قوة اختي –يحليلي مؤدبة- مافي مكان حق الحريم
جان تطالعني بعينين جاحظتين وتقولي : صفي بالدور .. والله حسيت ان جزيئات من كتله الشدو اللي حطتها تطايرت على ويهي البريء =اي حطو مكياج بس مو جذي فشلتونا
المهم قلتلهم: يلا بنات مشينا خنشوف مكان اهدى من هذا ومنها نشم المزيد من الهواء لوول
حصة : يلا فوقة
عطيات : يلا بينا
ورحنا الفرع الرئيسي المترئس الكائن في مكان من هذا الكون
صر احه كان هدوووء وفاضي حتى سنترالهم تحسونه يديد
دشينا خذينا ارقام وقعدنا وبينما كنت اتامل بالمكان شفت شي يتقدم نحوي بابتسامه مخيفة .. لا لا يبا خلاص ما ابي مساعده انطر دوري احس =\
ليش البنات صايرين يهولون بعمرهم جذي
انزين اذا ريولج مرقعه وركبج سودا من طيحات السكيتنج وتشقح سور المدرسة ايام الثانوية ليش تعذبين العالم وتخلينهم يشاركونج معاناتج لما تلبسين تنورة قصيرة !
وفوق هذا الشعر كشة تقول حاضنة عمود كهربا
مناظر مؤلمة صراحه .. ليش يلبسونهم تنانير قصيرة ترى قاع يخرعون المراجعين مو يجذبونهم بس وين اللي يفكر ..
بس ما ن اقتربت وصار بيني وبينها 5 سانتي الا انقذني الجرس معلننا دوري اروح اصرف الشيك
طلعنا من البنك فرحين مستانسين جنا توتا مستلمين عيادي بس فرحتنا ما كانت بالمعاشات كثر ما انا قاصين من الدوام =)
وانتهت رحلتنا بعزيمة على حسابي من البقالة وايد علي
لا لا مو بخيله بس ما كان حزة اكل هذا يزاتي .. !
ملاحظة : الشخصيات حقيقية بس الاسماء ليست كذلك وحقوق النشر محفوظة لدى بطاطة =)
"" .. قرار رقم 315 .. ""
السلام عليكم =)
بعد التفكير والتدقيق والتمحيص والمشاورات
قررت
انا المذكوره ادناه
ان اقدم استقالتي من دوام العصر بناءا على طلبي في اليوم الموافق 15\8\2006
حيث خلصت بطاريتي وقررت اني اتفضى
حق اشياء اخرى
اهلي .. رفيجاتي .. هواياتي وصحتي
اشتقتلهم كلهم =)
مشكلتي احب الشغل وما اعرف اقعد فاضية بس شكلي اشتقت للراحه ^_^
خصوصا مع قدوم صديقتي اليديده اللي لازم اخصص لها وقت بروحها واستمتع معاها =)
شكرا لكل من شجعني على هذا القرار ..
دليل على حبكم واهتمامكم
راح اكتفي بدوام الصبح واخلي الليل حقي وحقكم ^_^
بمناسبة ان اليوم يصادف سفر صديقنا الصدوق مصورنا المبدع
خالد العبدالغفور
نقوله تروح وترد بالسلامة انشالله ونتمنالك اجازة سعيدة مليئة بالراحه بعيدة عن هم الشغل
وناطرين صوغتنا من الصور الحلوة ^_^
''''.. Manooya .. ''''
"".. كانون خرجت من البيضة ..""
السلام عليكم =)
اعتذر للانقطاع الفترة اللي طافت بس كانت في ظروف اقوى مني جبرتني ^_^"
موضوعنا ::
رجعت لكم اليوم .. ومعاي ضيفه جديدة خفيفة لطيفة =)
راح تكون بدايتي انشاء الله لتنمية إحدى هواياتي ..
وهي : التصوير الفوتوغرافي
*_*
صديقتي اليديدة اسمها ::
canon a620
واهي خوش وحده صراحه بي يبيلنا وقت عشان نفهم بعض ^_^
